娛圈最近掀起分手潮，今日爆出拍拖四年幾嘅湯洛雯同羅天宇分訊，二人已分開兩個月，有報道指羅天宇已同陳瀅交往，傳佢哋早前一齊去大排檔食飯。
今日羅天宇對分手一事，以短訊回覆傳媒，佢承認分手，但避談陳瀅，佢話：「我同阿湯的確因為生活上問題，分開咗大概四個月，我哋一向喺感情上都希望低調，所以冇同大家講，我哋嘅分開係和平嘅，雖然我哋係分開咗，但係我哋仍然有繼續聯絡同關心對方，希望大家畀啲空間。」
對於陳瀅忽然被指係「新歡」，羅天宇覺得唔好意思：「連累到佢，大排檔嗰日，我哋有七位朋友一齊食飯 ，並唔係撐枱腳。」湯洛雯為湯鎮業姪女，早年拍攝《愛．回家》識到有錢仔羅天宇，發展地下情，拍拖四年幾，戀情慢慢浮面，早前湯洛雯有講過唔排除閃婚，更秘搬入羅天宇位於紅磡昇御門愛巢同居試婚，去年10月羅天宇生日，湯洛雯猶如「女主人」招呼圈中好友喺屋企P，以為佢哋打風都打唔甩，之不過有傳二人成日嘈交，幾經離離合合，相處出現問題，覺得唔可以維繫落去。
(蘋果日報)
