陀B7個月重咗10幾磅，佢話開始陀B時孕吐好嚴重，又頭痛又胃漲，一直嘔到5個月，呢兩個月先食到嘢，一餓就唔舒服，佢話：「老公都擔心我身體唔好，唔畀我一個人出街，盡量佢會陪我。」
由o靚模轉行當空姐、現年29歲嘅「E Cup Baby」劉欣宜，當年出道憑住34E奶寫真出位，佢前年嫁畀音樂人陳子敏，舊年底宣佈造人成功，預計今年5月將會誕下B女，距離「卸貨」仲有兩個月，肚大如籮嘅劉欣宜日前同老公拍拖去旺角掃嬰兒用品。
日前黃昏6點，劉欣宜兩公婆着住情侶牛仔布恤衫出動，劉欣宜唔單止挺住巨肚，本身係E奶嘅佢陀B後谷奶，目測佢上圍至少升一cup，着住tee都掹掹緊。劉欣宜同老公十指緊扣走入旺角某商場嘅嬰兒用品店，見佢哋乜都睇吓，包括BB手推車、嬰兒衫仔等，不過最大感興趣竟係一張多用途高腳椅（high chair），除方便父母給BB餵食，又可以畀BB躺下，陳子敏好仔細咁同老婆講解。
劉欣宜兩公婆每看中啱心水物品，佢哋都一定細閱物品質料，希望買到最安全同可靠用品畀囡囡使用。咁啱店中做減價，劉欣宜都錫住老公荷包，優先選擇減價貨，相信係因為家中即將添新成員，開支大增，所以劉欣宜都慳住買。佢哋掃貨期間，突然見劉欣宜用手摸肚，睇嚟囡囡一定喺肚內好興奮，陳子敏即暖男上身，體貼安慰老婆。
佢哋揀咗45分鐘左右，由陳子敏去埋單，劉欣宜則逗玩排隊旁一名約兩歲小朋友，母愛泛濫。陳子敏全程好緊張老婆，對佢照顧周到。
《蘋果》聯絡劉欣宜，佢話：「咁啱老公得閒，就出去買定BB嘢，差唔多要準備，好多嘢要買都好頭痛。」提到佢專揀減價貨，劉欣宜話：「我會睇品質，畢竟BB大得快，啱用先買，唔想嘥，要環保。」佢哋係看中一張可變搖椅嘅高腳椅，可惜只得陳列品，冇現貨。
陀B約7個月嘅劉欣宜，重咗10幾磅，佢話開始陀B時孕吐好嚴重，又頭痛又胃漲，一直嘔到5個月，呢兩個月先食到嘢，一餓就唔舒服，佢話：「老公都擔心我身體唔好，唔畀我一個人出街，盡量佢會陪我。」
佢仲話有咗BB後，食嘢口味變咗，心情變化亦好大，好彩老公錫到燶，照顧得佢哋兩母女照顧得好妥貼。由於劉欣宜同老公陳子敏都愛音樂，所以已經計劃一齊作首歌送畀囡囡：「我叫老公儲住心情，有靈感就即寫歌。」講到劉欣宜谷奶迫爆tee，佢笑住話：「咁密實都睇到。」佢仲話準備自然分娩，然後會以人奶餵育囡囡。
(蘋果日報)
