「阿邦，唔好怪我。」阿邦，係指的士邦——姚子羚男友、身家過億兼有過百部的士嘅的士邦鄭子邦。
去年胡說八道會一眾成員拉隊出埠為無綫拍旅遊節目《胡說八道真情假期》，又喊又笑好不感人，其中一集仲搞咗場大龍鳳，話胡杏兒睇中咗一個地方，好適合姚子羚同阿邦舉行婚禮，場大龍鳳仲出埋阿邦個mask，令步入教堂嘅姚子羚相當之「驚喜」。
李施嬅仲扮姚爸爸，同「阿邦」講：「我依家將個女交俾你，你幫我好好咁照顧佢。唔好令我失望。要令到佢開心，起居飲食都要照顧佢，帶佢去多啲旅行。」
說時姚子羚已經感動到哭笑不得。「迫婚」大龍鳳之後，姚子羚正接受訪問講感受，佢話：「其實頭先我已經覺得怪怪地0架喇，突然之間成班人唔見晒喎！係全部人！」李施嬅就話：「雖然明知係假，但唔知點解拖住佢嗰陣都有啲眼濕濕。」
鏡頭一轉，扮神父嘅豹嫂胡蓓蔚就話：「鄭子邦先生，你是否願意娶姚子羚小姐為你合法妻子，無論貧窮、富裕，或者健康或疾病，你都會一世都陪住佢？」戴咗阿邦mask嘅胡杏兒就話：「姚子羚，你係我一生中最愛嘅女人，我呢一世都會照顧你。我願意。」咁輪到姚子羚，就當然係say yes啦！
的士邦唔係圈中人，佢回覆周刊求證問佢係咪同姚子羚分手，佢都係答「我唔係呢行」、「我唔係呢行」。呢場迫婚大行動，係咪玩大鳥？
前年胡定欣同音樂人Terry分手，不少報道都話係因為女方迫婚，又話佢同豹嫂去英國旅行散心，十足今次姚子羚約龔嘉欣去日本散心咁。
當時胡定欣就表示自己係冇迫婚，並大方謂：「雖然我係到咗適婚年齡，但婚姻從來都冇得迫，我亦從來冇迫過任何人。」
(蘋果日報)
