廖碧兒之前有個有米男友——盛傳啦。呢個都市傳說，一直冇圖冇真相。
有關於呢位有米男友嘅種種，呢個Moment，已經都唔再重要，因為一向有辦法嘅廖碧兒，已經有新對象，就係之前本報「爆相爆片」讀者報料影到嗰位貌似三十代男子。
三十代，當然唔係指生於三十年代（sorry個gag真係太爛），Google一下唔難。可以同遊芬蘭，廖碧兒同呢位三十代美男，關係匪淺。哦，今日有周刊報道，原來此男係姓盧，叫盧啟賢（Calvin），唔係三十代，而係已屆四十嘅失婚富二代，有個女。你話佢筍盤都得，睇你需要嘅係咩啦。
【落機戴超】■廖碧兒日前跟約30歲黑衣男去芬蘭旅行後，坐商務客位返港。蘋果圖片
報道將呢位Calvin大起底，話佢離婚之後，其實已有一位泰籍百億電訊太子女女友，叫做Nina。咦，咁廖碧兒即係……嗯。介紹番呢位Calvin。佢係做投資嘅，即係娛圈成日用兼用到爛嗰個term——才俊。Calvin頗有家底，屋企人持有不少物業，佢就住山頂豪宅，市值約八千萬。
報道話，Calvin識廖碧兒之前，同有米女友Nina感情好好。但係呢，去年底就有啲奇怪事發生咗，例如，Calvin帶廖碧兒去半島酒店二人世界——燭光晚餐，仲飲咗唔少。據知，兩人飲到興之所至，仲kiss kiss同掂下手仔咁，估計都係社交禮儀一種同表現風度。飲咗酒，不宜揸車，Calvin有埋司機接送。可能廖碧兒叮一真係太醉——佢賣紅酒唔等如好飲得0架嘛，於是繞住男方臂彎借力亦都好合理。
報道指兩人等車期間表現癡纏，好似依依不捨咁。事後廖碧兒仲喺ig story貼圖回味，話：How to start a perfect evening…Hashtag係每支約一萬蚊嘅香檳krug 1989。半島呢一餐，加埋芬蘭此行，廖碧兒喺剛過去嘅中國情人節仲晒埋心心戒指，唔知係咪有所暗示呢？至於Nina就繼續貼下生活相，去下農場體驗；Calvin就繼續貼美食相，究竟係點呢？
(蘋果日報)
