陳凱琳今晚喺銅鑼灣出席一個腕表發佈會，今次新錶係關於12星座，陳凱琳主持揭幕禮，仲玩咗個星座占卜遊戲，結果就測到佢今年有驚喜事，有開心事發生。
之後佢接受訪問，就再一次俾人追問有咩開心事會發生，佢話：「懷疑8個星座都係好，自己唔係太清楚占卜呢樣嘢，覺得好得意當你知道唔好嘅嘢，盡快去改變，都係正面，驚喜都可以有唔同嘅喜事，唔一定係大家諗嗰樣嘢，知道大家好關心，司儀每次都會問。」
陳凱琳仲話噚晚同婆婆一齊睇佢嘅喜劇，咁婆婆有冇關心孫女嘅喜事呢？陳凱琳話：「其實佢都係專心睇劇，見到我有進步，佢都好享受睇喜劇。」
咁見過嘉穎未？「見過，佢好滿意，見到佢真人，覺得佢好識照顧人。」咁婆婆係咪覺得嘉穎好靚仔？「婆婆話真人靚仔好多，除咗靚仔，仲好有禮貌，夾餸俾佢，照顧人，俾佢滿分。」
3月14號係白色情人節，佢哋又點慶祝？「情人節冇送禮物，平時諗到都會買俾對方，今次可以送呢隻錶俾佢，因為佢係獅子座，仲會多幾粒石。」
(蘋果日報)
