46歲嘅黎姿(Gigi)喺09年同商人馬廷強結婚，婚後淡出娛樂圈專心相夫教女，兼且代替因車禍受傷嘅細佬黎嬰打理醫學美容公司，不過Gigi依然冇忽略家庭，經常帶住三個小寶貝周圍去，有一次Gigi帶咗佢哋去睇鹿，喺微博留言話：「女兒們的喧鬧竟然也是我的一種享受，身為媽媽的人就是這樣偏心吧！」
日前Gigi又再帶埋三個小寶貝出動，不過今次唔係同佢哋去日本睇鹿，而係去咗跑馬地一間寵物店。嗰日大約3點左右，見到Gigi四母女喺寵物店，同行仲有兩個外傭姐姐兼一個司機哥哥，司機哥哥企喺門口，睇實附近有冇人影相，三個小寶貝喺舖頭裡面同一隻大狗玩。
Gigi同啲職員傾啲好開心，似乎係交流啲養狗經，傾傾吓Gigi又拎住個電話同幾個寶貝影相。
之不過過咗冇耐，有途人喺舖頭門口經過見到Gigi，好自然咁企咗喺度望，Gigi好快就察覺到，兼且仲發現有人影佢相，之後行咗入去啲角落位，似乎係安排啲寶貝點樣避開鏡頭，最後Gigi自己一個人離開，不過佢似乎行錯咗方向，行咗兩個舖位都唔見自己架車，結果要司機哥哥叫佢先知道，於是黎姿一支箭咁行上車，而佢嗰三個小寶貝，亦都好乖咁拖住外傭姐姐上車走喇。
值得一提嘅事，已經係3女之母嘅Gigi依然好省鏡，著住紅色外套、白恤衫再配一條格仔長裙，又有另一種感覺！
(蘋果日報)
