麥美恩今日喺鑽石山出席「最『街』運動」活動，宣揚街頭健身運動。
司儀提到幸福指數，原來喺美恩心目中，現時最幸福嘅係希望有愛情滋潤，佢話：「呢一刻係希望喺愛情方面得到幸福，因為身邊朋友都結晒婚，屋企人都有介紹，不過佢哋話我要求太高，太奄尖，會覺得我難服侍。」問佢係咪有小姐脾氣？佢話：「又唔係好難頂，可能我唔肯煮嘢食，好小女人，唔會主動去做，所以要搵個好識照顧自己嘅。」
美恩仲爆已經5、6年冇認真咁拍過拖，依家叫佢相睇、甚至搵個細過佢10年嘅姊弟戀都冇問題，連麥媽媽都開始擔心美恩，新年要佢喺桃花下面行，美恩話：「自己要努力，好多人幫我物色緊，可能要搵西人，自己喺高中時曾經同外國人拍過拖，覺得都冇乜大分別，溝通上可以真係冇乜所謂。」
（Apple Daily）
