黃子華同佘詩曼主演嘅《棟篤特工》，票房超過4千萬，星期五喺銅鑼灣出席慶功宴兼玩直播，同網民傾下計。
子華接受訪問時話，諗住一千萬都叫做「脫毒」，二千萬已經係甩咗票房毒藥：「今次有四千萬，都算係入場卷，希望之後多啲戲可以拍多啲電影。」被問到叫唔叫「洗脫污名」子華話：「我唔覺《一蚊雞保鑣》係咩恥辱同污名。」
至於今年「票房毒藥」，似乎就係李思捷執導、主演嘅電影《一家大晒》！有網民發現，根據貿發局公佈嘅每周票房作數據，《一家大晒》上映咗11日只有91萬票房，大幅被同期對手拋離，而且由2月1日開畫至今，累積票房亦只有125萬元，慘被恥笑，話佢接棒子華神做「毒藥」！
其實《一家大晒》卡士唔錯，有狄龍、林敏驄、蘇玉華、元秋等，但就係谷唔起。
思捷以短訊回覆傳媒話：「香港有約130萬票房，我自己都覺得OK，一套獨立電影上7間戲院算幾好彩，多得百鳴哥旗下發行公司撐足我咁耐。依家馬來西亞上緊86間，遲啲會喺大陸上埋。作為新兵，已經非常感恩。」
只可以講句，下次加油喇！
（sina）
