江若琳同男友蕭潤邦、關菊英(菊姐)、樂隊ToNick同黎芷珊今日喺大潭出席「生命熱線慈善步行籌款」，甘比媽媽代表劉鑾雄慈善基金向大會捐出50萬元善款。
十指緊扣到場嘅江若琳同蕭潤邦透露婚期將於12月23日舉行，喺黃埔一酒店筵開40圍。婚後會唔會減少工作？江若琳話：「我會繼續做，但做生意，我會學，佢 （蕭潤邦）話會傳授功夫俾我，女仔生涯唔會好長，佢話俾我老年有個保障，所以有時我都會跟佢去開會，睇下舖頭點去營運。」
蕭潤邦笑住話：「踢佢入飲食業。」江若琳仲話o依家已經搵咗鍾舒漫、小肥、HotCha做兄弟姊妹團，佢笑指：「其實我阿媽同佢阿媽係唔識呢啲嘢，所以冇乜話要好傳統，對上頭完全冇概念，不過知道過大禮係結婚前1、2個月。」
江若琳表示蕭潤邦要搵頂酒朋友：「佢一杯就冧，所以佢會準備茶扮白蘭地。」蕭潤邦話：「o依家去飲嘅人，好少好似以前咁要隊冧新郎哥，見對方唔想飲都唔會迫佢。」江若琳笑謂：「大家高抬貴手，我唔想第一道餸就唔見咗佢，真㗎，佢平時一杯紅酒就醉。」諗到去邊度蜜月？江若琳指：「想去倫敦睇波，你睇我今日著曼聯波衫，就知我係曼聯球迷啦！」
菊姐表示閒時最鍾意係步行做運動，既可以欣賞沿途風景、呼吸新鮮空氣，又可以唔使花錢keep fit。《溏心3》原班人馬將合作舞台劇《秘密》，所以現時要投入圍讀、綵排。怕唔怕夏雨爆肚？菊姐笑住話：「我哋會制止佢。」
(蘋果日報)
