2011年港姐季軍兼最上鏡小姐許亦妮，去年3月被爆與從事餐飲同食品批發生意嘅朱曜楚（Choris Chee）拍拖，但男方俾人喺網上唱衰，許亦妮最終以「唔適合」為由，拍拖僅一個月極速分手。
不過許亦妮仲後生，29歲，仲擁有34D出眾身材，身邊當然不乏追求者。今年嘅情人節，許亦妮喺ig放閃，貼出一張拖手相，以留言”Fall in love with the person who enjoys your madness……It’s not exactly love at first sight, it is more like soul recognition.”
佢引用咗Lynette Simeone一句語錄嚟回覆，認為墜入愛河並唔係完全係一見鍾情，而係有一種似心靈認可嘅感覺。噚日元宵佳節，許亦妮嘅拖手相中仲見到一隻好閃嘅鑽石戒指，疑似求婚成功。
許亦妮仲作狀嘟嘴，留言話對方乜都啱，好似Boss咁，真係冧死人！而男友亦好浪漫，仲送上一束鮮花同情人節卡，不過許亦妮今次好保護對方，男友全程唔見樣，即使同大班朋友合照，都只有男友個樣被遮住。
許亦妮今日回《蘋果》時否認結婚，佢話﹕「No la,慶祝情人節而已。其實係成日影”follow me” 呢種相，冇咩特別意思。（要保護男友唔俾出鏡？）我向來拍拖都好低調。」
(蘋果日報)
