講到女兒任晴佳（Ella），琦琦總有講不完
的快樂事。回想當日懷孕，自己懵然不知，更險出意外。
「大肚嗰時真係唔知，仲好忙，飛來飛去，只係覺得個肚唔舒服，老公就話去睇下醫生，我係完全冇諗過自己大肚。我喺床上面，醫生話：『恭喜你！你有咗BB！』我話：『係咩？』，即刻啲眼淚嘩嘩聲流出嚟，因為真係冇諗過，係一個surprise。我之後即刻打俾華哥，聽到佢喺電話嗰面大叫。」
儍呼呼大肚，懷孕頭三個月是高危時段，琦琦竟然去了泰國跳水：「我去咗海邊玩，又跳水，又著高跟鞋，又飲椰青，乜都做晒，好彩無焗桑拿。我即刻同醫生講：『死啦，我咁咁咁咁，又坐飛機！』好彩冇事，真係上天俾嘅。」
本來名模keep fit大過天，琦琦為了腹中骨肉，積極進補，一胎就胖了57磅。「我知道大肚之後，醫生叫我飲牛奶，我就飲牛奶：朋友叫我食藍莓就食藍莓，一日食七種水果，食到自己好鬼肥，肥咗57磅。不過肥唔緊要，只要佢健康就得。」
暫停所有工作，懷孕那段日子，琦琦每日留在家中睇電視，和朋友見面，心情輕鬆，非常開心，「原來人生最幸福係做媽媽。你睇住BB喺肚入面一日一日大，個腳板仔踢你呀，係好enjoy。到生嗰陣，我咁大個人，從來未住過醫院，我好怕好怕醫生。嗰日瞓喺手術床上面，望住啲燈，真係好驚好驚。麻醉師話，你唔使擔心，數三下，數完真係瞓著，之後一睜開眼，醫生就同我講：『琦琦，你生咗個好靚嘅女』。」當日6磅3的小嬰兒，如今已長成170cm的美少女了。
(蘋果日報)
