「我鍾意身材好，白雪雪同埋後生囉。」曾被指性向成疑兼冇女埋身嘅唐文龍，早排同「億萬千金」、無綫36D咪神黃文意（Mandy）被傳暗撻半年。Mandy年僅25歲，同大佢23年嘅文龍年紀爭一截。呢段父女戀，不被看好。而兩人回應戀情嘅態度，亦越來越奇怪。
最初Mandy「唔小心」自貼同文龍合照時，文龍曾話覺得女方「係好女仔，有智慧，我同佢係正常朋友來」，女方就承認「都有出過街」，似乎雙方互有好感，但後來呢……後來就係，報道出街之後唔夠兩星期，雙方反應180度大變，可能因為有報道指Mandy係「奀星」、借唐文龍上位有關啦，Mandy話喺認識呢位友人（應該係指唐文龍）之前，已經上過C1頭條，而且最近亦避席公開活動，反問「上位的通道在哪裡呢？」
至於文龍，佢都喺ig貼咗一張就好失落嘅黑白相，留言﹕「有時候，知道得越多，發現自己其實懂得很少。」咦……而咁啱，陳敏之唔小心爆響口話，佢有日send msg恭喜文龍拍拖，對方回覆：「唔係，好耐喇。」um……….
今日文龍同陳茵媺、衛詩雅等人到尖沙嘴出席美容產品大賞頒獎禮，講緊扮靚keep住young心得嘅文龍被問到會唔會吸引到好多「妹妹仔」，佢就話：「我未婚，依家係單身，我都希望吸引到唔同年齡嘅觀眾同女仔。」
文龍又點會唔明記者想問啲咩呢？答完之後佢仲扮踢個記者「懲罰」對方。咁係咪真係同Mandy分咗手？文龍表示：「其實係冇喺埋一齊過。大家傳媒朋友對我好熱情好熱心咁報道過，俾咗不必要嘅壓力我同Mandy，同埋有啲措詞對佢唔係咁好，希望大家可以手下情。我覺得佢唔需要借人上位，我亦都冇位俾佢上。佢本身條件好好，係宅男女神又係大學生，我認識嘅佢係好有智慧，又讀到書，身形又好，希望大家放過佢喇，都寫咗兩個禮拜喇。」
新聞炒咗兩個禮拜，咁Mandy咪上位成功？文龍即補飛：「er…佢本身都好多fans嘅。我覺得觀眾都覺得夠囉，睇到厭。」至於發展空間，文龍斬釘截鐵話：「冇。大家係好朋友。」又稱依家專注事業。咁如果真係有妹妹仔飛撲埋身又點呢？文龍歎了一口氣：「唉﹛大家都知道我幾多歲喇。」又笑言傳媒寫親佢都寫埋年齡：「搞到啲friend都笑我，我真係嬲咗。」
(蘋果日報)
