琦琦由兩年前開始，籌備自己的珠寶品牌QQM，推出半年已知名度大升。入門價數萬元，主打十字架設計，張艾嘉、李嘉欣，以至不少女星名媛都是捧場客，變成人生第二個事業。
「其實我未諗過，幾年前個partner一直搵我合作，但嗰時我有其他合約未完，我同佢講，你等我啦。依家出咗半年，好幸運，反應好好。」開office兼showroom，樓都未睇過就簽約：「QQM係我第一個office，個牆係綠色，因為我鍾意薄荷綠，我想我office好cosy，好home feel，顏色好簡單，有啲植物，所以搵朋友幫我畫咗一幅好多顏色、好開心嘅畫。」
努力創業，全情投入，原來背後更有一個夢想。「講真，我唔係真係等錢用，但可以將自己嘅興趣，發展成第二事業，係一件好開心嘅事。同埋，我依家個女開始大，13歲喇，如果將來有一個事業可以留俾佢，係一個夢想，係媽咪俾女嘅一個心意。」
琦琦每事親力親為，連飾櫃中的磨菇小擺設，都是自己去花墟逐間花店搵。十字架為主打設計，皆因她在維也納長大，四處都是教堂，媽媽也是天主教，設計中蘊含了她的愛與根源，「我自己都好鍾意好多大牌子，好似Van Cleef & Arpels、Bvlgari，人哋真係百年經典，我哋一個100% Made in Hong Kong的牌子，點樣可以傳遁我哋嘅特別訊息？所以我覺得由心出發，所以揀咗十字架。」
愛shopping的琦琦，亦希望定價平些，她說：「Shopping一定要happy shopping，買完一樣想買第二樣，我嘅手工、鑽石係好好，但價錢係開心價，呢個都係品牌精神。」琦琦公司的員工，除了管錢的會計，大部分都是90後：「因為佢哋做嘢好快，好有衝勁，好有活力，我鍾意咁樣嘅團隊，可以帶領團隊一齊向前衝！」
世間無免費的午餐，琦琦多年來都keep到靚樣及身材。心態保持年輕、做人積極，正是琦琦的凍齡心得。「女人最好嘅保養品就係做嘢，做嘢可以保持一個年輕嘅狀態，同埋每天要正能量、愉快心情去生活。」當然亦要自律，「食呢，我食得好健康，早餐好大個分量，嚇死你，但我唔食麵包，我係食黑豆粥啦、雞蛋啦、蕃薯啦嗰類，我寧願食飯都唔食麵，夜晚要少食澱粉質，一個星期至少五晚係戒澱粉質的。」
日常多飲水，養生飲品包括：紅棗杞子女、綠茶等。老公、囡囡愛拉筋、跑步，華哥亦買了一部跑步機，鼓勵琦琦一齊跑：「一個星期至少上一次跑步機，著晒啲打boxing衫，焗住出汗至少跑一個鐘頭，同埋跟黃佩霞一齊做瑜珈。」至於護膚，琦琦強調潔膚重要，「我好鍾意敷mask，eye mask都鍾意，一得閒就敷。」
(蘋果日報)
