節目中經常做下靶角色，一直有傳佢比森美鬧走，今日終於係佢嘅Last Day。
林珊珊大女李澄(西瓜)喺商台做咗DJ 8年，新一年嘅開始，西瓜決定離開商台向外闖，今日係佢嘅last day，佢就預備咗散水餅派畀同事，西瓜接受訪問時話：「心情有少少緊張，因為呢份係我第一份正職，離開係一個大決定，8年嘞，覺得唔捨得，今朝做早晨節目播最後一首歌，都忍唔住喊，好感觸。」
森美
西瓜透露將會做司儀同配音嘅工作，仲有可能會做電視主持，問佢會唔會好似森美咁參與幕前？佢話：「好似佢咁要有番咁上吓味道，佢經歷咗一段長時間，先成為男子漢。」佢仲大讚森美勤力兼行動力高，事業成功，自己好難追得上，係佢嘅好榜樣。有指西瓜喺節目經常畀森美鬧，咁今次係咪畀森美鬧走？佢就話：「當然唔係，如果咁講真係不負責任、唔識感恩，佢真係鬧㗎，不過嗰種係打鬧，佢時時提點我，係我恩師，用血汗捧我哋出嚟。」
有指森美鬧走西瓜，西瓜就話咁話講真係不負責任。
（Apple Daily）
