南韓冬季奧運會正式閉幕，前大律師林作喺社交網上有感而發，透露出他約十歲時曾到北韓的經驗，佢話：「望住南北韓運動員好團結咁一齊步入會場，我就想起當年10歲左右，媽媽曾經貪玩，靠著（着）喺內地嘅政經人脈，用假身份喺吉林帶咗我入去北韓近中國邊境嘅特別經濟區觀光，並渡（度）過一夜。」
「呢個決定，太過不負責任。」
林作憶述：「呢個係我人生最黑暗嘅一日。我亦感覺此後同媽媽嘅關係冇溫暖過 – 呢個決定，太過不負責任。」林作指自己並不是到了有地鐵的平壤等大城巿，而是鄉下，佢話：「我去嘅，係連食水、熱水供應都有問題嘅鄉下。導遊兼挾持人質式嘅半軍佬帶我地（哋）去遊客商店逛。見到細瓶日本製汽水，即刻大讚然後俾（畀）面買咗支。上番車，睇番製造日期 – 過期兩年。」
「夜晚住嘅酒店別墅，似乎死過人。」
至於住宿方面，林作又憶述：「夜晚住嘅酒店別墅，似乎死過人 – 床單唔乾淨有血跡（漬）、浴缸嘅污跡證明好耐冇人住過。間房佈滿蜘蛛網。我媽媽要求自費去附近佢見到嘅一間「國際酒店」。導遊話 – 你今晚唔留喺度住嘅話，聽日有可能會被扣留。我地（哋）嗰晚冇訓（瞓）過。」
「媽媽細個好瘋狂。」
林作接受訪問，他對往事仍猶有餘悸，稱「驚到依家。」對於林母如何搞假身份入北韓，林作說：「媽咪有大陸朋友，畀臨時中國證件我哋。（畀錢搞？）媽媽朋友送嘅。大約發生2000年左右，我嗰時大約11歲，我當時仲未去英國。當時我真心覺得會被扣留，因為我哋基本上唔願意留低，當晚就想走，個導遊唔畀，我哋話換間正常啲酒店都唔畀，僵持不下，然後佢凶我哋，我覺得我哋玩完，尤其係身份係假嘅。（點解媽咪咁大膽？）媽媽細個好瘋狂，人生就係找尋刺激，媽以為自己識人就OK。（有咩人去？）一啲內地官員嘅配偶同親戚。（你媽咪到依家都冇驚過？）我媽知自己過意唔去，從未再提過，我咁大個人佢都基本上從未再叫我去旅行，全家新年遊除外。」問到爆料會否擔心對媽咪及其他人有影響時，林作淡定地說：「咁多年，驚咩？」
(on.cc)
