向海嵐係98年四料港姐冠軍——兼奪最上鏡小姐、都會動感大使及環球美態大獎。當年佢係大熱摘冠，但所謂大熱，唔係坊間，而係因為佢個姓氏令人聯想，而且嗰陣向海嵐個下巴仔都好突出下……
點都好，總之那些年嘅向海嵐，成為無綫旗下藝人，曾參演《刑事偵緝檔案》、《金裝四大才子》、《七姊妹》及《帝女花》等劇集，備受力捧，00年的《楊貴妃》、02年的《無頭東宮》及05年的《胭脂水粉》更擔正女主角，扮演的奸角令人印象深刻。
但向海嵐喺無綫嘅時間線，只係去到2005年。之後，突然工作量大減，08年向海嵐索性告別娛樂圈，轉行去大陸做公關。
經歷都幾似當年張兆輝喺無綫由小生變成林峯身後嘅佈景板咁…當年佢接受周刊訪問，就訴苦謂：「我試過四個月冇工開，當時好迷失，唔知自己有咩唔妥。最後同公司傾，佢哋就安排我做一套新劇，仲話因為係我，所以已經加多咗劇情同俾多啲機會我發揮。不過，當我接咗套劇之後，先知個角色係做一個公司高層，開會我要坐喺度，其實唔係一個好有發揮嘅角色，只係公司啲普通職員咁樣。」
07年底播完佢做第三女主角嘅《建築有情天》（方中信、伍詠薇嗰套），向海嵐就同無綫講Bye bye，由慧妍雅集永遠榮譽會長朱玲玲鋪橋搭路，安排佢入羅康瑞旗下嘅上海新天地、幫瑞安集團擔任公關工作。2013年向海嵐重返娛樂圈，去年5月簽約汪子琦旗下，但最近合作已告終。向海嵐現身商台節目《1圈圈 星光背後》主持梁泰來訪問，佢話，其實呢，佢係唔介意做配角，但希望自己嘅角色，會係重要嘅角色：「喺最後一套劇，我主角變配角，是其中一個令我不想再留喺呢度嘅原因。其實我唔介意我係唔係做主角，我覺得只要我嘅角色喺一套劇裡面係有一個影響力，我已經好滿足。
「譬如有一個例子，我成日講嘅，就係《胭脂水粉》。嗰套劇我唔係主角，但故事最後有一個轉折位，就係原來所有壞事都係我做出嚟嘅，而呢啲事係影響成個家族發生咁多事出嚟。到依家仲有好多人會記得我喺嗰套劇裡面所飾演嘅奸角，我就會覺得咁樣已經滿足到自己。」
至於點解由主角變配角，向海嵐話佢自己都唔明點解公司會有咁嘅安排，但直認同公司發展方向不一，所以離開：「當時真係覺得佢哋不斷俾我嘅角色都係唔特別重要，或者唔特別討好嘅角色，至於備唔備受樂小姐（樂易玲）重用，咁就真係要問佢先至知。」
向海嵐話：「我自問自己係一個幾有禮貌嘅人，亦唔係一個會亂講嘢同容易得罪人嘅人。所以我就好好奇，點解公司會有咁樣嘅策略，呢個真係要問對方。我自己覺得既然我同公司嘅發展方向不一，咁就係時候要分開喇。」唔知係咪心中有刺，所以向海嵐之後復出娛圈，大家問會否重返無綫，佢就答：「有興趣了解新電視台。」明晒。
(蘋果日報)
