蔣怡（CoCo）和李亞男兩位幸福人妻昨日喺旺角出席一個美容品牌推廣活動，噚日蔣怡喺宣佈再同老公翁狄森（Dickson）成功「造人」，CoCo昨日透露今胎係陀仔，已經5個幾月，連同佢哋之前嘅4歲女兒翁容，湊成一個好字，感到好開心。
腳踏兩寸尖頭高踭鞋現身嘅CoCo，身形發福，佢透露預產期係6月尾，可能係巨蟹仔。問到B仔改咗名未呢？CoCo話：「冇咁快，好難改呀，成件事太surprise，嗰陣時幫我個女改名完全冇留過餘地要改第二個名，第一個翁容已經好好聽，第二個男仔真係未諗到，又想簡單唔好太多筆畫咁複雜，但又想好聽，暫時冇乜feel，可能要再遲啲。」
咁會唔會停工待產？CoCo話：「陀BB 4至5個月都好少出嚟見大家，因為真係好辛苦，成個人胃口變晒，又冇力，好多時候都係屋企，o依家啲胃口返晒嚟，大家都見到我都覺得肥咗，我成日同我囡囡講我係媽咪pig。」CoCo指上個月已經肥咗10磅，自己都覺得有啲愕然，仲話：「可能係男仔關係，吸收好多，冇乜食嘢都大，好事嚟，做一個開心嘅媽咪pig。」
CoCo話老公應該都會想揀日子開刀， 依舊會幫BB剪臍帶同入產房，不過估唔到竟然囡囡都話要剪臍帶，仲話要幫BB沖第一次涼，同爸爸爭過。
另外，李亞男同王祖藍結婚3週年紀念在網上放閃，兩人先同家人去了北海道，之後去咗杜拜過二人世界慶祝，順便造人。李亞男話：「希望今年可以成功，當然唔好畀自己有壓力。」李亞男見到CoCo懷胎送上祝福，以及去摸下沾旺氣。至於講到佢個好姊妹苟芸慧（苟姑娘）公佈婚訊，李亞男戥對方高興，希望幫佢做到姊妹同阿四，等緊苟姑娘通知。
(蘋果日報)
