依家各有家室，想約埋食餐飯都有啲難，貼相嘅Yumiko留言﹕「係香港都難見，日本先可以見到。」
唔知大家仲記唔記得「雷神」呢？唔係Marvel系列，而係三級系列嗰位，曾經拍過港產賣座三級片《3D肉蒲團之極樂寶鑑》嘅雷凱欣。雷凱欣當年憑住36F上圍，喺電影中一秒露點而成為佳話，被封「雷神」。不過有人質疑露點嗰個唔係佢，而係用剪接替身，被人話係「老點」。
但呢啲都係過去式，因為雷凱欣已經變咗一位賢妻喇！佢喺2012年撻著擁有近200架的士嘅車行太子爺陳智聰（Jack），自此絕跡娛樂圈，閒時同Jack周圍旅行，坐私人飛機吃喝玩樂，生活寫意。為咗「洗底」，雷凱欣都刻意低調，平時喺社交網多數貼食物或環境相。
點知噚日鄭希怡(Yumiko)竟然唔小心洩密，Yumiko近日一家三口去咗東京旅行，喺街上遇見雷凱欣都係一家三口，因為除咗Jack之外，佢仲揹住一個肥嘟嘟好得意嘅BB，面形圓碌碌，但樣似雷凱欣多啲，相信係二人嘅愛情結晶品。
據悉雷凱欣去年喺ig story貼咗一隻巨型鑽石戒指，當時好多人都送上祝福，但張相僅存24小時就冇咗。Jack同Yumiko嘅老公Andy好老友，Andy結婚當日，Jack都係兄弟團之一；但現在各有家室，想約埋食餐飯都有啲難，貼相嘅Yumiko留言﹕「係香港都難見，日本先可以見到。」
由於東京都幾凍，雷凱欣都係着住厚衫，但就戴咗頂帽同紮孖辮，一副賢淑look，與昔日性感女神形象相差甚大。
而雷凱欣隨後都有喺ig貼大頭相，但就得佢一個人，周子駒都驚訝留言﹕「終於見到樣！」
《蘋果》問過Yumiko關於雷凱欣嘅事，佢就回覆：「人哋嘢我唔講咁多⋯ 希望明白。」
(蘋果日報)
