太陽娛樂揸弗人周焯華（洗米華）雖然同Mandy Lieu生咗仔女，但農曆年同情人節呢兩個大節日，洗米華都要乖乖返屋企交人。
據知洗米華陪家人去咗日本度歲，玩到大年初三先經香港返澳門，洗米華同洗米嫂陳慧玲現身香港國際機場海天客運碼頭時，就被讀者黃小姐透過「爆相爆片」分享，洗米華獨自企埋一邊密密撳手機，唔知係咪向Mandy報到呢！
黃小姐接受電話訪問表示：「嗰日4點幾，見到佢哋喺香港機場等緊船返澳門，大約有10個人。」問到洗米華同洗米嫂有冇互動？黃小姐話：「洗米華全程企埋一二角撳手機，Heidi就同老爺一班人坐喺度等船開，老婆冇行埋去同佢傾偈，兩個人天各一方完全冇互動，細女就坐喺bb車。」
從讀者提供「爆相爆片」所見，掛住撳手機嘅洗米華雙腳交叉企，挨住欄杆擺出X形chok pose，全程專注低頭兼雙手忙着撳撳撳，而洗米嫂就素顏戴有框眼鏡，手挽Chanel袋，步出閘口時用手抓面，睇嚟啱啱落機個樣有啲攰攰哋，同行還有洗米華爸爸、家姐、兒子周柏豪同2歲細囡周善潼等。
(蘋果日報)
