36歲袁偉豪（Ben）與26歲張寶兒（Bowie）去年5月拍攝無綫旅遊節目《打工捱世界Ⅱ》時火速撻着，雖然相戀不足一年，但兩人愛得甜蜜蜜，早前Ben被問及結婚計劃時，他曾表示：「唔排除任何可能性。（接受先有B後結婚？）睇到時有冇呢個Feel囉！當然都要尊重寶兒家人。」可見他早已認定Bowie為結婚對象。
每日都好事近
而適逢新春佳節，前日Ben特地與女友往中環見家長，當日下午四時許，他先驅車往女友位於將軍澳的寓所，並於香閨逗留個多小時後才接載女友直駛中環，兩人下車時見記者在場亦笑笑口，提及二人是否趕往見家長傾婚事，Ben尷尬說：「拜年啫。」問到Bowie好事近時，待嫁的她即風騷甜爆說：「我哋每一日都好事近，每一日都充滿幸運。」
齊齊睇家電
及後兩人前往了商場的電器店，未幾即見Bowie父母及弟弟前來會合，期間Ben與Bowie父母有傾有講，又齊齊研究音響等電器，一行人之後拉隊往附近食肆晚膳，席上Ben亦「融入家中」，與未來外父外母傾到笑笑口之餘，體貼的他又不時為他們斟茶遞水，逗留個多小時Ben主動往埋單後，便與女友先行離開往取車。Bowie父母步出食肆時，被問對未來女婿是否很滿意，二人初時笑而不答，再問張母Ben值幾多分，她即四萬口說：「100分。」
Bowie事後接受訪問時，透露屋企近日要裝修，故Ben與他們一家行街揀選電器，順便給予意見。問到其父是否跟Ben平時都傾得很投契時，Bowie笑言：「大家都知佢對生活品味不嬲都好講究啦！都係傾啲音響嘢，大家溝通吓啫！大家行到夜咪一齊人食飯囉！冇話專登約定！ （屋企人對Ben好滿意？）佢哋好多嘢都由得我，見我事業、生活各樣都好，都好開心。（父母有冇催婚？趕做狗年新娘？）呢啲隨緣啦！」至於Ben接受訪問時坦言：「我只係幫佢哋選擇一啲家庭電器同拜年，我哋好好，多謝大家關心。」
