無綫小花陳嘉寶（Anjaylia）同賴慰玲（Winki）喺2017年，不約而同於同一日8月28日入紙結婚！與舞台劇演員梁子峰奉子成婚嘅Winki喺同年9月低調簽字，再喺12月初生咗囝囝Marat，而Anjaylia就喺同年11月25日與男友黃頌祈結婚！
嚟到新年，兩人都係首度以人妻身份過節，咁就梗係要派雙封利是啦！呢日佢哋就約咗好姊妹陳凱琳（Grace）見面，男友鄭嘉穎都有去添！
Anjaylia同Winki喺Instagram上載合照，佢哋都話第一年派利是，Winki留言：「要派利是比（畀）鄭生 陳小姐」！
相中見到未婚嘅嘉穎收利是時笑到見牙唔見眼，幾咁開心！抱住Winki囝囝時又一面冧樣，啲父愛滲晒出嚟呀！
雖然嘉穎同素顏嘅Grace都好低調唔一齊影相，但大合照時都企埋一齊，愛人一對對。
網民都乘機催婚，留言：「祝鄭生同陳小姐快d（啲）拉埋天窗然後下年新年派利是比（畀）Marat.」唔知幾時可以改口嗌「陳小姐」做鄭太呢？
(on.cc東網)
