「我找數！」
冇錯，城城郭富城宣佈，佢找數！講緊嘅當然係日前See See TVB fb搵番佢1994年接受祝文君訪問，應承大家：「我希望有一日，到將來我結咗婚嘅時候我先至派利是吖！
城城：（望向鏡頭）個個都有份！我講過嘅，全港嘅市民，都會收到我嘅利是（舉起手指，語氣肯定）不過可能係好多年之後…」
由1994年等到依家，等到喇！今日城城到海港城出席狗年新春活動，身穿藍色唐裝衫、戴住藍色太眼鏡風騷現身，笑到四萬咁口，開開心心大派做咗人夫之後嘅利是。
一講到94年嘅承諾，城城話佢都有睇條片，眼神有啲唏噓咁話：「廿幾年前喇！其實嗰陣時我真係一個小朋友，咁但係到依家成家立室，係一個大人啦！我找數！」嘩！「但係有一個問題係，你唔可能叫我逐家逐戶咁派利是，係冇可能發生嘅事，依家我有一個方法，咁呢封利是呢，我會集埋一封，集合全港市民嘅利是捐出去，希望分享呢個福氣，代表全香港市民，去傳承落去，好唔好呀？希望呢個福氣，可以更多人去受惠。」而受惠機構，就係聯合國兒童基金會。
多謝城城！
(蘋果日報)
