袁詠儀小學嘅時候就讀聖公會呂明才紀念小學，今次佢就同大家一齊返到佢嘅小學，袁詠儀仲講到以前教佢嘅老師姓羅，係羅家英嘅姐姐或妹妹，袁詠儀自己都唔記得，而呢個消息仲係家英哥話畀靚靚知。返到去小學，袁詠儀仲好受小朋友歡迎。
袁詠儀化身領隊帶大家重遊佢母校。
難得來到母校，當然要影相留念啦。
靚靚細心閱讀告示版上的一切。
講到讀書，袁詠儀仲分享佢嘅初戀，嗰陣佢大約十三、四歲，讀女校，對方係阿哥啲同學，都係警察嚟㗎。袁詠儀o依家諗番，都唔知對方大過自己幾多歲。唔使問，屋企一定唔俾拍拖。袁詠儀笑：「好刺激嘅，因為阿媽唔俾嘛，越係唔俾嘅嘢就越係刺激㗎啦。」做過啲咩？「拖下手去街囉！」錫錫？「梗係有啦，我話冇你都唔信啦，唔係點叫初戀啫。」頓了頓，補多句：「只到錫錫啫。」初戀維持咗一個禮拜就散，因為阿媽鬧：「我阿媽叫我都係唔好搞咁多嘢。佢話『其實識個朋友冇所謂囉，但你係咪要咁快就拍拖呀？會唔會好似又早咗啲呀？』突然間覺得阿媽講得好啱吖嘛。」
剛好學校正係午飯時間，所以靚靚才有機會進校內懷緬。
但係，若不是家有嚴母，袁詠儀話，「嗰陣時如果佢唔約束我、唔撳住我呢，即係例如，唔准去camp呀、唔准去街呀，唔准呢樣嘢唔准嗰樣嘢，咁我覺得以我咁愛玩嘅性格，我絕對係會變成一個未婚媽媽。」通常都係咁，一個唱黑臉，一個唱白臉。阿媽負責嚴嗰part，阿爸當然係溺愛嗰part，但身為警察嘅袁爸爸，嗜賭。「嗰時啲差人都好鍾意賭錢，我媽咪話畀我聽呢，嗰時出咗糧，我媽咪係唔敢買嘢俾我哋食㗎，因為可能出糧嗰時，爹哋已經輸晒啲錢。」
一眾小師弟妹，見到靚靚這位大師姐，都非常雀躍。
(蘋果日報)
