噚日係年初三赤口，中國傳統指呢一日容易同人發生爭執，為咗唔想新年流流招惹是非，有啲人選擇呢一日唔去拜年，而係去拜神祈求一家人新一年行好運，不過人與人相處，坐埋聚會又唔一定鬧交嘅。
TVB藝員噚日辦團拜，一眾藝人高海寧、陳山聰、馮盈盈、莊思敏、張文慈、張致恆、楊潮凱、楊玉梅、林韋辰、林淑敏及劉佩玥等去咗無綫高層樂易玲屋企，馬國明同黃心穎、陳展鵬同單文柔、袁偉豪與張寶兒、楊明同莊思明等攜眷出席，一雙一對。
高海寧同緋聞男友鄧智偉都有同場，不過佢哋刻意坐開，繼續保護愛苗，未知幾時到呢pair好事近呢!?
睇番呢一眾大台小花當中，似乎2016年香港小姐冠軍馮盈盈最得樂小姐歡心，當中有一張相，根據坐位嚟睇，見馮盈盈坐正喺樂小姐身邊，相中樂小姐疑似搭住佢膊頭，難怪馮盈盈就算喺節目語出驚人，照有唔少演出同做司儀嘅機會。
(蘋果日報)
