衛詩雅今日喺facebook貼咗一張LEGO迪士尼城堡相，呢個城堡起碼高兩呎，喺LEGO界嚟講都算係巨人級，貴重事物衛詩雅當然有好好珍惜，不過睇真啲，呢個城堡遇到意外，其中一個城樓冧咗，成件甩出嚟，衛詩雅開post話：「一直以黎我都好努力咁保護個城堡⋯但唔知點解個城堡都會倒下⋯⋯原來有D嘢佢要倒下係唔需要原因同理由⋯⋯」
連衛詩雅都唔知咩事座城堡會冧，但有網民就將件事聯想到新年，話估計係有人上佢屋企拜年唔小心撞到，導致意外發生，仲勸佢小心為上，以後喺啲模型附近放番個警告牌。
亦都有樂觀朋友留言，話城堡冧咗，可能係喜訊嚟，好快會有白馬王子接佢，o氹番衛詩雅話：「因為有王子出現，要同你建立新城堡。」
咪係囉，呢座冧咗，買多個砌下成雙成對，幾好吖。
(蘋果日報)
