狗年到，陳倩揚祝大家心想事成、身體健康！
懷孕4個月嘅陳倩揚，日前喺尖沙嘴接受訪問，佢透露今胎嘅預產期係7月中，提到大仔同二仔相隔3年半，呢胎又係相隔3年半，倩揚表示係計劃之內，初時都諗過一次過，想將時間精力貢獻咗先，跟住就慢慢收成，但佢發覺每生一個，反而想多啲陪小朋友，見證佢成長，到兩兄弟返咗學，佢覺得係時候再生。
唔知今次係咪想追女？倩揚笑住話：「呢個係好美滿嘅畫面，但係真心講，仔女都冇所謂，最重要係一切順利、健康，咁已經係一個好大禮物。」
咁即係唔照仔定女等驚喜？佢表示：「咁又唔係，我係一個好需要準備得好妥當嘅人，如果係女仔，床仔、房嘅顏色要轉，如果係男仔，要留番兩個哥哥啲嘢，醫生話等5個月再照得清楚啲先再公佈，同埋長輩都好心急想知。」
農曆新年倩揚選擇留港度歲，提及佢喺FACEBOOK專頁教烹飪，當然唔少得就係整年糕、蘿蔔糕，佢話：「我想承傳父母、公公婆婆、爺爺嫲嫲嘅傳統，我想小朋友認識過年嘅食品係乜嘢，自己整，感覺上健康啲，好開心能夠分享自己經驗俾新手媽咪，大家反應好好，我都好有滿足感。」
佢表示今年已經整咗超過12個嘅年糕，因為年糕冇想像中難整，主要材料係水、糖、糯米粉同粘米粉，3、4個步驟已經完成。會唔會開舖？佢笑住話：「有相士話我好夾煮嘢食，但係我O依家主要係湊小朋友，顧好屋企，加上又有主持工作，所以等我儲吓煮食經驗，我相信將來係有呢個機會。」
(蘋果日報)
