90年攞港姐冠軍、91年拍第一部劇《我愛玫瑰園》做女主角，紅得好快嘅袁詠儀（靚靚）當年只有20歲，年少輕狂目空一切，加上性格又直率，把口永遠快過個腦，緊接嘅後果就係得罪人多，試過嫌劇本唔合理，直接搵監製投訴，再向傳媒投訴，結果被無綫踢入「雪櫃」挫銳氣。
回望過去冇後悔，靚靚接受《蘋果》連載專訪直認：「其實嗰段時間我係好容易得罪人嘅，講嘢可能真係冇思考過，我唔係唔知天高地厚，我覺得有啲嘢真係要講㗎，怕我都要去做，你又唔講，佢又唔講，咁做唔到㗎喇喎，咁我咪去講囉，當然你話我問題喺邊度呢，我就係說話藝術修飾得唔好，我唔識呢樣嘢，我會直接就係：『喂！咁樣得唔得呀？可唔可以呀？』咁你咪就係第一個衝去前面、又冇禮貌、死咪死嗰個囉！」
當年橫衝直撞，係咪成日俾人鬧呢？靚靚坦言：「我直接雪藏啦，乜鬼嘢鬧啫。」咁有冇上公司搵高層解決？靚靚話：「我冇呀，其實TVB雪咗我咁耐，我根本就唔知自己得罪人，但對我嚟講其實都係好運，因為我就係太得閒，突然有個電影導演叫柯受良就話：『喂，可以搵下呢個叫袁詠儀嘅人。』咁我就出咗去拍電影。」
因為柯受良賞識，靚靚加入影圈拍處女電影《亞飛與亞基》，得到金像獎最佳新演員，事業開始一飛沖天，一年拍14部戲，94年憑《新不了情》及95年憑《金枝玉葉》兩奪金像影后。
然而，攀上高山後，卻突然走向低谷，靚靚都覺得莫名其妙：「97、98年，突然間冇戲拍，突然間冇人搵你拍，就算搵你拍都係嗰啲7日呀10日呀，我又冇去了解喎，淨係覺得突然間，你拍開啲大製作㗎嘛，30幾組40組㗎嘛，突然間嚟搵你都係10組，我唔係話嗰啲唔好，只不過唔係自己想拍嘅嘢，咁再跟住慢慢發現，直頭連呢啲10組8組嘅都唔嚟搵你，唔知點解！」
當時靚靚冇好唔開心，只係覺得會唔會係突然間，呢個娛樂圈唔適合自己？靚靚皺眉話：「係咪我有啲乜嘢唔係好啱呢個圈呢？咁我又冇諗退休，我最多都係諗歇一歇啫，橫掂都冇乜嘢做，不如去學下普通話、演戲呀，咁都好呀係咪先，都要知道自己嘅不足，嗰時嘉禾就畀我去上海。」
喺上海留咗幾個月，靚靚返港拍完一兩部戲，之後就接咗台灣電視劇《花木蘭》：「公司（嘉禾）問我想拍乜呀？我梗係想拍女人戲喇，成日都好想拍好似張艾嘉呀蕭芳芳呀張曼玉呀呢啲女人戲，但係唔知點解就冇，你梗係希望唔同階段有唔同作品，想再追另一個叫做進步，咪去咗拍《花木蘭》囉。其實我覺得遇着一部《我愛你》，我都好鍾意嗰個劇本，但可能嗰時氣氛唔係好適當時機，因為佢哋話好灰呀，但其實真係一個好劇本，因為你寄予厚望，但出嚟個成績唔好，對我嚟講都係一個打擊。」
(蘋果日報)
