眾所周知名模周汶錡（Kathy）大仔Jacques超級可愛，更有不少粉絲，細仔Avner與哥哥餅印一樣，但性格捷然不同，大仔雖然溫文，但若媽咪抱細佬，即醋意大發推開細佬，出嗲功要媽咪抱抱。
Kathy去年家中多了新成員，細仔Avner十個多月大已開始學行，而大仔Jacques一直是萬人迷，賣萌加上表情多多，還唱起國語版新年歌：「恭喜！恭喜！恭喜你！」超級可愛。為迎接新年，Kathy特別為兒子添新衣，兩兄弟穿同一款唐裝，似到十足。二人幫媽咪搞糖果盒時十分雀躍，更不時偷食，Kathy表示平時甚少給糖果仔仔食，但到新年就大解禁，她說：「都盡量唔會，因大仔食親糖就會咳，萬試萬靈，佢都知食得多知要睇醫生，所以食咗就要吐番出嚟，佢都好聽話。」
Kathy一直主力照顧大仔，問到細仔出世後大仔會否呷醋？她說：「細仔準備學行，放多咗時間，哥哥會唔開心，會成日都呷醋，見到我抱住細佬，佢會推開佢要我抱，平時又會做啲嘢引你注意，我覺得呢個係天性，因為將啲集中力轉移咗。（點樣教導佢？）唔會打，會同佢講。細佬就要錫，佢唔識食、唔識行，叫大仔要照顧佢，佢都好聽話。（會否追多個女？）如果有個女都會開心，女仔始終斯文啲，睇吓湊細仔有幾吃力先，睇吓今年湊成點樣先，順其自然。（細佬性格同阿哥係咪唔同？）細佬性格剛強啲，可能做細霸道啲，大仔比較溫文啲，開心就笑，細佬就好大聲笑，成日大叫！」
Kathy雖然嫁了法籍老公Julien Lepeu，但過新年依然會跟足中國習俗，她表示由細到大糖果盒都是她主理，會買各式各樣的糖果，而老公亦十分喜歡過農曆年，說：「佢嚟咗香港13年，都已經入鄉隨俗，最鍾意派利是，覺得一年一次派利是好開心，多謝平時幫助佢嘅人。」
(on.cc東網)
