16年被爆拍拖，之後大方承認戀情，但昨日突然PO文。。。
前新聞主播周嘉儀喺16年被爆同經民聯立法會議員、全國政協林健鋒嘅仔林凱章（Victor）拍拖，事後大方承認戀情，仲讚男友對佢好好，好關心佢，大家相處得開心，希望呢個甜蜜期可以繼續落去。
昨日係情人節，周嘉儀如常喺fb同fans玩互動，佢貼咗幾張著住紅色背心裙嘅相兼留言話：「各位早晨，今日係2月14號星期三。今日部份時間有陽光，夜晚沿岸有霧，都幾溫暖，15至19度。正所謂女為悅己者容，不過+2(嘉儀)就覺得扮靚啲可以令自己開心啲醒神啲，唔需要係為任何人嘅，+2(嘉儀)喺度祝各位無論有情人定冇情人都快快樂樂，開開心心過每一日。今晚我就同一大班朋友一齊食團年飯喇，你哋呢？」
話晒情人節同農曆年嘅日子好接近，約埋啲朋友一齊食團年兼慶祝，都唔係啲乜嘢奇怪事，不過睇埋佢啲hashtag，似乎有啲嘢發生咗：「#冇情人嘅情人節都可以好快樂 #各位都為自己努力 #周嘉儀 #venuschow」
昨日《蘋果》搵過嘉儀了解，佢承認自己單身咗一段時間，再問佢新年願望係咪搵到有情人？佢就話：「順其自然啦，都唔強求，多謝關心！」
(蘋果日報)
