一代性感女神葉玉卿（卿卿）早年下嫁商人老公後暫別幕前，並移居美國生活，專心相夫教子。前日適逢係卿卿嘅生日，原來大女胡芷欣（Victoria）一早準備咗驚喜，突然現身餐廳為媽咪慶祝生日。佢仲喺社交網上載合照，又賣口乖話自己只愛張床同媽咪，咁乖女又冧豬，梗係氹得卿卿不知幾開心啦，仲話囡囡嘅出現係最好嘅生日禮物！
相中所見，壽星女卿卿面紅紅，似乎飲咗幾杯落肚，睇嚟玩得好盡興。佢仲同囡囡攬腰合照，唔少網民都話Victoria盡得媽咪真傳，愈大愈靚女，身為媽咪嘅卿卿亦不遑多讓，一直Keep住咁索，身材仲弗到漏，難怪網民大讚係「兩大美人」啦！
隨後，Victoria仲自爆送驚喜畀媽咪時，其實喺冇水撥嘅情況下冒雨駕駛，相當驚險！嚇親嘅卿卿立即留言叫囡囡唔好咁冒險，一定要安全至上！
(on.cc東網)
