動作電影帶領香港走入黃金年代，呢股熱潮可以話由李小龍推向高峯，同時亦都影響住梁家仁，佢亦見證住港片嘅輝煌。
佢話當73年李小龍猝死，有一段時間自己未搵到重心，所以低落咗一陣，直到成龍出現，港片重現高峯，佢話:「李小龍之後大家未搵到一個重心追捧嘅目標，後尾成龍出咗嚟咪又動作片嘅高峰期。佢嘅《蛇形刁手》、《醉拳》呀，周圍破紀錄，犀利。」梁家仁都係拍動作片出身，不過佢原來冇學過功夫，全靠自己籃球隊底好，佢話:「跳起轉身踢下咁，我有打籃球所以跳起轉身踢呢啲動作係靚啲。第一次拍導演張徹啲動作片，咁咪係現場學囉。我記得第一個鏡頭劉家良師傅度一個鏡頭二十幾下，一take劉家良師傅話okay，全部武師拍掌。」佢話後來先知原來可以NG。
武打巨星梁家仁原來冇學過功夫，全靠自己籃球隊底好，受劉家良師傅賞識。（攝影：陳俊強）
講到香港有東方荷李之稱，梁家仁覺得香港電影嘅人才都係香港:「但個市場細，機會唔大，創作就範圍窄。依家個電影潮流好、市場好、都係係大陸，我覺得好快趣就大陸超越香港。點會唏噓呢，咁你更加要跟上去個潮流到。喂，依家拍咩戲啊？依家拍戰爭片，個子彈咁樣做，依家特技。我哋以前無啊嘛，邊有特技做啊。二樓跳落黎都自己跳落嚟啦。邊有做特技啊、邊有替身啊，你唔得就第二個做啦。
69歲嘅佢依然好身手。
梁家仁對電影業發展欣然接受，對舊人仍然懷念，不得不提是大哥大洪金寶，佢話:「可以講係我恩師，係電影裏面，係佢提拔我。電影合作最多就係元彪，同我最佳拍檔。當然跟住仲有周星馳啦，引我入去做喜劇。傅聲係我好懷念嘅一個合作對象。」佢仲記得傅聲死當晚喺無綫化妝間化緊妝。就連囝囝英文名，都用返故友嘅英文名Alexander嚟紀念。
閒時佢都會一班朋友切磋球技。
梁家仁覺得電影嘅人才都係香港，但個市場細，機會唔大，創作就範圍窄。
(蘋果日報)
