有綠葉王之稱嘅韋家雄，佢喺今年元旦日，罕有咁喺fb放閃，公開自己有一個索爆女友，估唔到公佈戀情冇耐，韋家雄已經打算同女友喺今年閃婚。
今日有周刊報道，韋家雄坦言對女友Kaynes一見鍾情，識咗第二日就已經約去黃金海岸食飯，之後大家都有意思繼續發展，幾乎日日都會見面，難怪韋家雄覺得呢啲係緣份，冇諗過同朋友飲嘢都可以識到女友。
本身已經離咗婚兼且有一個20幾歲仔嘅韋家雄，佢話自己喺幾年前同女友分手之後，冇諗過再婚呢件事，點知遇到Kaynes之後，拍咗拖一個禮拜已經有結婚嘅諗法，亦有傾過呢個話題。
韋家雄仲話計劃喺今年結婚，仲有籌備一個驚喜十足嘅求婚儀式，除咗一班朋友對女友讚不絕口之外，阿仔都戥佢開心，阿媽仲認定女友做新抱！Kaynes接受周刊訪問亦都話，對男友第一個印象覺得佢好真誠，相處之後俾咗佢好多安全感，所以覺得係Mr.Right。
(蘋果日報)
