梁朝偉喺賀歲片《捉妖記2》中，偉仔飾演一名靠賭為生嘅古惑仔。（視覺中國）
農曆新年到處拜年，除咗坐低食瓜子講近況，俾親戚朋友追問幾時拍拖結婚生小朋友之外，打衛生麻將聯誼感情，都可算係華人至愛新年活動。講到娛樂圈中賭術最高明嘅，通常會先諗起發哥周潤發，原來真正嘅高手係梁朝偉先啱，佢仲話自己逢賭必贏從未輸過錢﹗
估唔到梁朝偉除咗演技出眾，賭術都相當利害﹗（視覺中國）
喺賀歲片《捉妖記2》中，偉仔飾演一名靠賭為生嘅古惑仔。佢喺內地宣傳活動上就話，現實生活中每年過年都會同家人小賭一番，決戰四方城，而且多來來從未試過輸錢，逢賭必贏咪仲勁過賭神﹗偉仔話秘訣就係「見好就收」：「不要一直在那玩，贏一點就跑，我贏100塊就走了，所以每一年都贏！」
1994年嘅《神龍賭聖之旗開得勝》中，梁朝偉同鄭伊健有唔少對賭戲份。（影片截圖）
對上一次見到偉仔主演古裝電影，已經要數到2009年上映嘅《赤壁2：決戰天下》，相隔近十年終於再次接古裝戲，原來偉仔本人相當抗拒古裝扮相：「因為很怕黏頭套，尤其是冬天，還要補膠水，很討厭。」呢次片商都係以真人加CG拍攝去打動偉仔接戲，有影帝加持，想打破上集24億人民幣票房紀錄應該成功在望﹗
最近梁朝偉忙於穿州過省宣傳賀歲片。（視覺中國）
(HK01)
