趁生日公開戀情：「你好，34歲。你好，我的女孩。 」
內地男星韓庚向來感情世界都備受網友關注，估唔到佢今日趁住34歲生日，喺微博以「我的女孩」宣布同曾參與電影《戰狼II》女星盧靖姍（Celina）拍拖，而韓庚則為電影唱主題曲，他留言：「你好，34歲。你好，我的女孩。@盧靖姍CelinaJade 」
之後Celina亦都轉發韓庚微博嚟個「夫唱婦隨」，又風騷晒新相，真係隔住個Mon都覺得好鬼甜！
二人宣布拍拖後，唔少網友都送上祝福，當中為二人當「紅娘」嘅吳京，亦有喺微博恭喜二人，仲叫佢哋做「我的男孩女孩」添。
另外，有網友指佢哋兩個去年九月出席金雞獎，韓庚同Celina一齊頒發「最佳音樂獎」，當二人落樓梯時，韓庚好細心咁扶住Celina，之後Celina喺微博公開多謝對方，有可能當時已經種下情「庚」。
擁中美血統嘅Celina，喺香港長大操得一口流利廣東話，15歲時更向小室哲哉拜師出過一張唱片，之後參演多部港產片及西片，亦曾參與大熱美劇《綠箭俠》第一至四季。
(on.cc東網)
