台美混血歌手倪安東，09年由《超級星光大道》走紅，但近年來負面新聞係咁爆。呢位育有一女嘅人夫，去年六月被爆偷食女歌手管罄，激吻照曝光，倪安東老婆ViVi頂唔順老公係咁偷食，日前以配偶權遭侵害為由入稟，向倪安東與管罄分別索償100萬新台幣（即27萬港元），及爭取女兒撫養權。案件於下月14日台北地方法院開庭。
管罄同倪安東至今尚未回應，但有指倪安東早就將財產轉移去母親名下，ViVi就算打贏官司，拎唔拎到錢都成問題。講番倪安東，佢真係「出色」到一個點。2010年同任職護理師嘅ViVi結婚，2011年女兒出世，倪安東因為擔心婚訊曝光，竟狠心唔陪太太入院；直至2014年才拍片承認秘婚誕女，稱：「因為愛，暫時不讓妻女接受外界關注。」
為人父後，倪安東感情生活仍然精采，偷食嫖妓都做齊。去年同管罄激吻照曝光，原來仲有後續。當時Vivi向倪迫供，倪亦和盤托出，自揭曾偷食「女神級藝人」、某女藝人、知名主播，甚至曾於新加坡召妓。
據錄音稱，當時Vivi追問倪安東同該名女神級藝人上過幾多次床？倪回答兩年前喺北京，稱「只有一次」，ViVi追問：「她床上表現如何？有沒有比我好？」倪安東答：「比你好。」嬲到ViVi要倪安東用微信同女方對質，但對方回覆：「我以後不會和他再見面了、我都要結婚了。」
問題就係，曾經同倪安東合作過且能稱為女神嘅，只有2012年合拍《愛的麵包魂》嘅陳妍希，同2013年合拍《天后之戰》嘅劉香慈，仲要係咁啱兩女都結咗婚。
結果劉香慈同陳妍希急急澄清，劉香慈話：「我沒去過北京。」陳妍希就透過公司駁斥，稱若有傳媒或網民發表不實言論，將採取法律行動。
(蘋果日報)
