藝人鄧健泓（Patrick）與石詠莉（Sukie）去年底結婚後，直到前日兩公婆才起程去馬爾代夫度蜜月，不過就撞正當地爆發政治危機，全國進入緊張狀態！二人早已在社交網站報平安，Patrick就表示暫時一切安好，大家不用擔心。
鄧健泓親自揸機為老婆石詠莉影靚相。
半夜入院
Patrick說：「我哋前晚到咗馬爾代夫，要住一晚酒店先嚟依家呢個resort，但一去到馬爾代夫，係好奇怪地見到防暴警察同水馬擺喺酒店門口，我有問過啲當地人，佢哋就話有抗議事件，但瞓咗一晚之後，真係唔好彩，Sukie扁桃線發炎，我哋要去醫院睇病，當時係凌晨四點幾，醫院都冇咩人，我哋好安然睇完醫生攞咗藥就返酒店。尋日朝我哋喺酒店出發，見到有警察喺市中心，我哋都係照上船返機場去 resort，暫時一切正常。」
社交網報平安
現時Patrick夫婦身處馬爾代夫其中一個小島，一切平安，Patrick說：「暫時都好寧靜，冇嘢發生，運作好正常，啲人好似唔太擔心，都好有禮貌、好有service；Sukie噚晚食藥之後好好多，都有精神，係有啲喉嚨痛，好彩帶咗佢去醫院，因為之前扁桃線發炎會令到佢發燒。」今日Patrick更在fb貼上太太「影後」相，以示兩人平安無恙，Patrick並感謝親友們的關心。
鄧健泓石詠莉去到當地先知發生咗政變。
好彩都順利到咗resort。
一去到就忍唔住狂影。
(on.cc)
