無綫藝員曾偉權喺劇中經常做奸角，演反派非常出眾，成為大台御用奸人，不過現實中嘅曾偉權就相當有愛心，尤其照顧小動物，曾偉權從事動物義工多年，曾為多隻流浪貓狗善終，見到貓狗被撞死後，屍體躺於馬路，佢總會送牠們最後一程，執拾屍體及火化。
曾偉權facebook截圖
佢噚晚於facebook貼出一隻用膠袋裝起貓貓嘅相，又貼出一張馬路上有血跡嘅相，留言：「午夜冰冷的路面發現你可憐的小身軀!沒能為你做甚麼，只有讓你有點尊嚴地離開。」不少網民回覆道謝「多謝你送牠最後一程」、「多謝有心人」、「多謝你執起佢，免佢被轆到變扁」及「感謝你為貓貓做」。
曾偉權喺劇中經常做奸角。網上圖片
曾偉權多年前已開始做動物義工，幫流浪狗做絕育放回，早年同宣萱救咗一隻喺電視城古裝街附近嘅唐狗女妹妹，唐狗女妹妹匿咗喺貨櫃底，怕電視城古裝街建成，貨櫃被拎走，唐狗女會被漁農署捉走，曾偉權決定收養，佢至今收養過十幾隻狗，目前飼養5隻狗仔。
曾偉權從事動物義工多年，非常愛護小動物。網上圖片
(蘋果日報)
