歌手吳若希（Jinny）為澳門闊少男友Alex（何兆鴻）於去年4月誕下愛女淼淼後，同年10月10日註冊結婚成何太，早前花40萬到巴黎10日影婚紗相。
穿上白色喱士婚紗的她冧笑樣如額頭鑿住「幸福」兩字，兩人除在巴黎鐵塔下擁吻及做出心心甫士外，穿上便裝時也攬到實一實，好鬼癡纏。
首次踏足巴黎的Jinny接受東網訪問，分享拍婚照的甜蜜事，她指只影了一套婚紗：「其實我之前做event都着咗好次婚紗，今次正式做人妻影婚紗相時，唔使着咁多套，只要靚靚就得㗎啦。」
影其他相時，Alex見她凍，就以體溫送暖，她說：「嗰度天氣都好凍，老公就全程攬住我，用佢件大褸包住我囉。」
除拍照外，兩人狂食和購物，問可有劏到老公「一頸血」？她晒命：「佢自願，任我劏㗎，佢成日叫我去Shopping，我睇中啲手袋，但怕行另一間有更抵嘅，就唔買住，點知佢偷偷買咗啲我試咗好耐又冇買嘅袋畀我，我都多謝佢嘅。」
今年是Jinny首年以人妻身份派利是，問她是否已準備豪派大利是，她說囡囡淼淼亦是第一年𢭃利是，更突變「精明何師奶」說已準備了利是攻略，她稱：「我已經有策略同朋友講晒，就係我派雙封，而囡囡收番單封，但利是錢係同等，咁就唔會蝕。」
今年將正式回歸香港樂壇的她將搬回香港，她又說：「本來同老公『暫時分居』，但佢唔捨得我，我又唔捨得佢，所以佢會跟埋我返香港住，或者我會喺香港買個大啲嘅單位。」而囡囡就港澳兩邊走，更指她媽媽最開心可常見外孫女，又謂：「我問阿媽我得意啲，定囡囡得意啲，阿媽次次都話囡囡最得意，好可愛，依家冇人阻擋到阿媽覺得阿女真係好得意。」
另外，Jinny近日曾向朋友呻食欲不振，情緒低落，令人擔心她情緒病復發，但Jinny說：「我冇事，只係氣管敏感，嗰排覺得辛苦啲啫，但依家我唔想食，都會照食嘢。」
(on.cc東網)
