混血模媽Ana R.與英籍老公Brad已育有兩歲幾囡囡Maya，今日就喺fb同Ig宣佈再有BB，已懷有18周、即4個幾月身孕。Ana就同Maya齊齊影相宣佈呢個喜訊，話Maya做大家姐，而Maya就滿面笑容指住媽咪肚，而Ana腹部都好大，母女構圖好溫馨。
Ana就回覆《蘋果》再做媽咪心情：「呢一胎少少意料之外，成家人都開心，預產期係7、8月，都會同第一胎一樣喺香港生，已知道BB性別，不過想保留少少神秘，仔女我都鍾意。」
講到Maya做大家姐，佢就話佢好開心，亦都唔會擔心有呷醋問題：「囡囡性格好與世無爭，加上屋企有3隻狗，佢不嬲習慣同識得分享。」
Ana今次佗狗B相當熱鬧，因為佢同門師妹警鐘胸Jessica C亦佗狗B，預產期只係差一個月，相信兩個準媽媽會交流唔少佗B心得。
（蘋果日報）
