歐陽震華（Bobby）同黃柏高今日喺中環，為一間鮑魚專門店擔任剪綵嘉賓，Bobby更即場試食鮑魚，事後佢話今次幫朋友做代言人，咁酬勞係咪收友情價？佢笑住話：「接近天價。」有冇送股先？佢表示：「唔話你知，我哋唔講呢啲嘢，友誼第一。」
Bobby幫朋友做代言人，佢話收友情價，但講笑數字屬於天價。
對於有指郭晉安同無綫轉簽部頭合約，改簽王祖藍做經理人，陳豪亦有意離巢賺人仔養家Bobby認為好多藝人未離開過無綫，就會好想出去睇下：「當年我拍《壹號皇庭II》定《壹號皇庭III》之後，我都出咗去10個月，拍下電視電影、客串電影，同埋去馬來西亞拍處境劇，之後《壹號皇庭》系列再開拍，我先再返無綫，我唔排除人嘅本性係好奇，所以冇壞；我喺無綫，啲人唔係唔想搵我，而係手續好繁複。」
仲即場試食鮑魚！
陳豪有冇問佢意見？Bobby笑笑口咁話：「使乜問我意見，佢未試過就親身體驗下。」係咪搵錢多咗？佢即刻話：「呢樣唔使講，當然啦！」10個月嘅收入係咪無綫收入嘅3倍？Bobby表示：「點只呀，（當時仲返無綫？）因為人情味，由保安外圍打招呼打到化妝間，以前科技冇咁先進，大家有個交流，0依家個個拎住電話，好靜，所以科技帶嚟冷漠。」
講到《誇世代》拍檔陳豪想到大陸拍劇，佢覺得出去走下都冇壞。
(蘋果日報)
