見到馬國明除咗知道佢識做戲，仲會諗起啲咩？網上周不時翻loop馬國明以前同吳卓羲、黃宗澤等人組成奧運六星，又唱歌又跳交叉舞步，真係令人念念不忘。正正由於念念不忘，所以必有迴響，馬國明今日下午出席商場活動時就即唱唱出兩首劇集主題曲，雖然唱功未至於令人耳朵懷孕，但至少都見得下人嘅。馬明接受《香港01》訪問就話，自己一向對唱歌都係抱住一個心態︰「因為我份人無乜廉恥，唱成點我都唔會理！」
講到新年必做嘅嘢，馬明幾乎都係用「媽咪呢…」呢句做開場白，其中他就透露每逢新年媽咪都會買桃花。相信有好多人都知道桃花行3個圈就最好，但馬明就唔止行3個圈而係行百幾個圈，他笑言，「其實我係行幾廿萬個圈，總知你行到幾多得幾多，因為桃花係娛樂圈都代表觀眾緣，唔止代表求另一半，所以我年年都行好多嘅！」
下星期就生日嘅馬明，佢就係工作中度過，但佢完全無話唔開心。「我新年同生日都要搵外快，接了一個job，所以就好開心。新年都係同屋企人過，因為之後我就要開劇拍到6月，同埋要返內地拍，會有段長時間見唔到屋企人。」問到咁女友心穎BB點算呢，會否抽空到對方家中拜年時，馬明就表示，「佢啱開劇都好忙，如果搵到時間都會去，可以去逗下利是。」
蔡思貝今日就孖住馬明一齊出席新年活動搵真銀！(溫菁莉攝)
(HK01)
