由藝人轉型做DJ打碟的黃泆潼與意大利籍老公Kavemura結婚兩年，一直表現恩愛，日前兩公婆被拍到西九龍一個商場歎咖啡時突然吵大鑊！
當晚約8時，兩人在咖啡店內邊歎咖啡邊有傾有講，但未知是否Kavemura言語間激親老婆，黃泆潼突然愈坐愈開，與老公離行離列，更突然黑面，嚇得老公即施冧功，又伸手輕摸老婆膊頭，但黃泆潼索性擰歪面唔理老公，眼尾都唔望一吓，Kavemura則繼續想辦法氹老婆。
擰歪面唔理老公！
塊面黑到呢…
期間有途人經過，見兩人耍花槍亦忍不住眼望望，但嬲爆爆的黃泆潼未有理會，依然用個背脊「得」住老公，而Kavemura就鍥而不捨繼續撩老婆傾偈，經過約半小時「發功」，黃泆潼才下番啖氣終於有反應肯理番個老公，兩公婆和好如初。
佢老公都不停氹佢，最後和好如初，咁咪幾好！
轉型做DJ打碟的黃泆潼，型到爆！
身材依然係咁Fit！
(on.cc)
