昔日屬「地獄廚神」的李亞男，推出首部食譜《暖•男廚房》，亞男昨今日去到尖沙咀出席新書發布會，好友岑麗香及王君馨出席撐場。老公王祖藍、鍾嘉欣及苟芸慧拍片為李亞男打氣。王君馨同岑麗香喺活動中，為亞男送上兩條印有英雄人物嘅圍裙，亞男表示期待第二個BB出世。
被視為「地獄廚神」嘅亞男，喺記者會上笑指自己今次終於「破地獄」，佢話：「以前煲湯都落味精，做咗人妻之後，努力改變又會問媽咪同奶奶點煮，認真研究。」
李亞男透露，婚後被老公王祖藍彈過無數次廚藝，佢話：「試過煲雜菜湯，發現香港原來有好似火鍋湯底嘅調味，我用嚟煲湯，祖藍好捧場飲晒，但我話其實落咗好多味精，佢個樣好唔開心，自己覺得好失敗仲喊，反過來要佢氹返我，之後我決定要學好廚藝。」
亞男指食譜用作鼓勵人妻及女友，好似佢廚藝一竅不通，而慢慢成長。亞男指老公非常支持，訂購一定數量，同時買咗唔少送俾親友，講到李亞男身邊嘅好姊妹廚藝如何，亞男話：「卧虎藏龍都唔定，Linda（鍾嘉欣）喺加拿大都有同我分享廚藝心得。」
亞男計劃推出第二本食譜，佢話之前腸胃炎，令佢計劃推出健康食譜。
(蘋果日報)
