藝人陸永同Reina生咗一對好可愛嘅囡囡陸一穎（Hannah）同陸一心（Simsim），眨吓眼Hannah就已經6歲大喇！趁住生日呢個大日子，陸永同Reina就當然會同囡囡慶祝喇，但就竟然有「不愉快事件」發生咗！
Reina就喺社交網甫相講晒成個故事畀大家知，事源係Hannah就開咗個生日會，Reina就偷偷約咗佢嘅同學仔嚟參加，一見到有同學嚟Hannah就好興奮仲玩得好開心。
但呢個時候Reina同Hannah講訂咗個佢最愛嘅菠蘿包做生日蛋糕，Hannah都忍唔住講咗句：「媽咪，你係咪整蠱我咋？」到陸永拎個蛋糕出嚟，Hannah個心先定番啲，仲感動到眼濕濕！
連佢媽咪都話估唔到6歲嘅囡囡會感動，不過唱生日歌嘅時候Hannah個樣勁唔開心喎，原來佢唔捨得切爛喺蛋糕上面隻貓頭鷹，所以最後大家決定唔切隻貓頭鷹淨係切個蛋糕，Hannah即刻開心番晒！
對於呢個咁可愛嘅舉動，網民都大讚Hannah可愛，仲話佢除咗個樣之外完全唔似6歲！當然仲有一大班網民祝佢生日快樂喇！
(on.cc東網)
