喺90年代加入商台嘅前DJ蘭茜（簡詠嫻），嗰陣佢除咗做電台節目之外，仲做埋廣播劇，受到唔少聽眾嘅歡迎，直到90年佢轉咗檔去新城，又以醜女形象做遊戲節目主持兼拍電影
當年因為楊寶玲，令到蘭茜嘅形象改變咗好多！(資料圖片)
之後蘭茜同楊寶玲主持節目教人扮靚，即刻改變咗一生，嗰棚哨牙唔見咗，成個形象都變得高貴大方。
當年蘭茜唔介意扮醜女！(資料圖片)
蘭茜喺06年淡出娛樂圈，有報道話佢同富商Johnny Cheung結咗婚，嗰陣仲有消息話佢轉行做公關唔夠一年，就去咗港大讀人類學碩士，之後又讀埋珠寶鑑定，不過除咗同楊寶玲仲keep住聯絡之外，基本上佢好少再同圈中人聯絡。直到2016年，有傳蘭茜婚姻出現問題，但依然貫徹低調作風，冇回應過件事。
年近半百嘅蘭茜，似乎keep得幾好喎！(蘋果日報相片)
食得仲好清淡。(蘋果日報相片)
(蘋果日報相片)
日前有《蘋果》讀者關小姐透過「爆相爆片」，表示喺中環一間西餐廳捕獲蘭茜，讀者關小姐話：「嗰日中午喺餐廳見到蘭茜同一個女性朋友食飯，中途見到蘭茜拎咗部iPad，佢哋兩個似乎睇得好開心，手舞足蹈，不過餐廳嗰陣唔係好多人，加上好多仲係外籍人士，所以唔係好多人留意到佢。」
讀者仲讚蘭茜keep得好好：「講真我覺得佢靚過以前好多，皮膚好白滑，我見佢食嘢都好清淡，嗰陣係佢食pasta而唔係啲heavy嘢。」又係喎，睇到蘭茜一身貴婦look嘅打扮，同當年又真係分別唔大！
(蘋果日報)
