元旦宣佈再度懷孕嘅葉翠翠，今日喺灣仔出席營養食品活動，雖然佢已經懷孕4個幾月，但佢依然着4吋高嘅高踭鞋、春季露膊裙，影完相後急急披番件外套。
翠翠喺台上透露懷孕頭3個月，佢照食快餐同煎炸嘢，之後開始小心飲食，食一啲長胎唔長肉嘅食物，同埋盡量走油。佢又指今胎陀得比上胎辛苦，因為始終要照顧大仔津羲，不過心情冇第一胎咁緊張。
受訪時，講到對4吋高踭鞋，怕唔怕老公周曉東唔准？翠翠話：「佢車我嚟，冇所謂，都係一陣。」佢透露6月係預產期，已經訂定醫院床位，又會擇日開刀，佢仲話：「重咗7、8磅，開頭好辛苦，成日攤喺度，近排好啲，同埋成日發惡夢，老公番工前會錫我，點知我發夢見到有蟲跌落我度，我就一搥打到我老公度。」
有冇照呢胎係仔定女？翠翠話：「唔想知住，冇所謂啦，但老公就想係仔，因為可以同佢玩，生女就危險啲，0依家啲女仔12、13歲就話拍拖，仔就話可以話佢，感覺冇咁蝕底，但如果生女，就要日日接佢放學。」老公有咩奬勵？佢笑住話：「冇呀，平時節日都冇，只係寫張卡畀我，仲要張張都一樣。」
咁即係老公太專一，佢笑指：「吓！冇計，以前追我都係送太陽花、龍鬚糖，就算送鍊我又唔鍾意。」老公咁冇情趣怕唔怕佢嬲？翠翠話：「佢都慣，佢個人冇乜所謂，我都係講事實，只要唔係屈佢就得，我啱啱懷孕，好想食粥，佢番工前買畀我食，但我以為佢冇買，同朋友篤佢背脊，雖然佢聽到，但都冇嘢。」津羲知唔知自己做哥哥？佢話：「佢應該唔識。」
（蘋果日報）
