無綫劇《誇世代》喺之前舉行嘅台慶頒獎禮奪得「最佳劇集」，噚晚一班演員歐陽震華(Bobby)、陳豪、邵美琪、江美儀、麥明詩約埋去尖沙嘴慶功，連被大台封殺嘅張繼聰都有出席。
郭晉安同無綫嘅合作方式改變咗，轉簽部頭合約，仲改簽王祖藍做經理人，與此同時，亦有指陳豪快將約滿大台，盛傳佢會離巢返大陸拍劇賺人仔，陳豪就解釋自己同大台嘅合約仲有一段時間，但佢就補充話都差不多時間要傾約，仲話續約最緊要開心。陳豪話拍咗咁多年劇，都想有唔同發展，拍吓合拍劇或者大陸劇咁，但佢重申並非想離開無綫。
此外，Bobby同邵美琪都未有出席頒獎禮，Bobby就話自己頒獎禮當晚正喺大陸做舞台劇，當時知道都好開心。講到舞台劇對手萬綺雯爆佢想操馬甲線，Bobby就話因為同劇嘅Otto(陳志健)，身形勁弗，之前陳豪同張繼聰都有叫佢一齊操，但Bobby就話自己鍾意食嘢，今次見到Otto唔駛戒口，佢笑話：「我o依家有條鯨魚線，希望可以操到有人魚線，但要等到過完新年先開始。」
最近深夜大台重播邵美琪主演嘅劇集《我本善良》，邵美琪就話套劇係28年前嘅作品，令佢想番當時去英國拍外景嘅片段，仲話自己亦有微信搵溫兆倫，亦有fans去英國時專程搵佢哋嘅拍攝場景㖭！
(蘋果日報)
