正所謂「鐵漢柔情」，男人喺出面點拼搏打天下賺錢養家係一回事，返到屋企，見到妻兒就明顯地係另一副面口，尤其係唔少圈中男星，天王級都好喇，平日要幾man有幾man，但一提到佢哋嘅千金，即時唔同樣，好似錢嘉樂都由搞笑派變慈父，真係咪睇小前世情人嘅影響力！
其他「見女就變臉」嘅男星仲好似有郭富城咁，身為天王嘅佢，都真係要乜有乜咁滯，平日對感情事三緘其口，但一提起囡囡Chant，城城冧樣出晒嚟，把口話為咗保護囡囡乜都唔講，但其實佢為人父啲開心感覺滿到瀉。
另一位有名嘅圈中慈父，係演戲同沖咖啡都好叻嘅陳豪，陳豪同老婆陳茵媺之間育有兩子一女，雖然係幾個仔女佢都錫，但講起囡囡時，陳豪個樣又係冧豬啲！
至於同陳豪一樣有弗爆身形嘅張繼聰，同太太謝安琪舊年成功追到個B女張靖（Karina），阿聰不時喺自己嘅社交網站上載囡囡啲相，字裡行間，慈父feel走晒出嚟。
而縱橫影視界嘅任達華亦係一樣，喺演藝作品中演活警察、大賊、壞人，但返到屋企就係一個好爸爸，佢同囡囡任晴佳感情要好，佢曾經喺訪問度自己陪個女學彈琴，希望兩父女一齊成長，成件事你話幾sweet呢？
(蘋果日報)
