戀情已經處於半公開嘅馬國明同黃心穎，經過8日嘅歐遊後，似乎佢哋又進一步了解咗！
之不過今日有周刊報道話，向來慳家嘅馬明，甘心為女友大出血，日前仲影到馬明單拖去咗車行嘅showroom，嗰陣馬明直入去VIP房，身邊仲有sales全程招呼，臨走嗰陣仲見佢拎住個信封，唔知係咪準備買車o氹心穎開心呢。
報道仲話馬明嘅媽咪似乎唔多接受心穎，覺得佢貪威識食，連佢嘅家姐都落晒閘，搞到馬明都唔敢帶女友返屋企。事後馬明接受周刊訪問，佢否認送架車俾女友，話當日只不過係去做servicing(維修)。心穎接受周刊訪問亦都話如果要換車只會係自己買，o依家都係一個舒服嘅相處方式。
至於有冇見過馬明嘅媽咪，心穎就話有見過，但就唔算係正式見家長，大家嘅屋企都冇催婚，而且對佢哋嚟講，結婚仲有一段距離，順其自然喇！心穎仲話plan緊同馬明慶祝呢個月13號嘅生日。
(蘋果日報)
