無論係無綫劇《射鵰英雄傳》梅超風，抑或電影《嚦咕嚦咕新年財》中老人痴呆嘅劉德華阿媽，黃文慧嘅演技都叫人留下深刻印象。現年67歲嘅資深演員黃文慧(Bonnie姐)，入行52年，由粵語片《無字天書》拍到《春嬌救志明》，做過無綫、亞視、港台、HKTV及有線同奇妙電視，人妻、阿媽等幾乎乜嘢類型角色都演過，演藝生涯絕對係多姿多采，不過，感情生活方面，67年嚟佢重係「雲英未嫁」，令Bonnie姐覺得係佢人生中一大遺憾。
67歲嘅資深演員黃文慧(Bonnie姐)，入行52年，仍然「雲英未嫁」令Bonnie姐覺得係佢人生中一大遺憾。
適逢Bonnie姐近日同邵音音幫奇妙電視拍攝真人Show節目《使乜驚 大兩Gen》， 節目就幫Bonnie姐一償着婚紗做新娘子心願。
適逢Bonnie姐近日同邵音音幫奇妙電視拍攝真人Show節目《使乜驚 大兩Gen》， 節目就幫Bonnie姐一償着婚紗做新娘子心願，幫佢搞咗一個大型婚禮，仲安排埋小鮮肉吳智杰同佢結婚行禮，吳智杰係奇妙電視90後年輕主持，今次同Bonnie姐可謂大搞嫲孫戀；至於邵音音就負責證婚兼做新奶奶。
呢個婚禮日前喺九龍塘嘅「My Garden」舉行，為求製作認真，奇妙除咗安排Bonnie姐着全套婚紗外，仲搵嚟鄧月平、鄺芷凡及余慕蓮做伴娘，婚禮喺邵音音嘅見證下一對新人進場，進行宣誓及交換戒指，然後切蛋糕同合巹交杯，最後當然唔少得重頭嘅咀咀環節，兩人應台下兄弟姊妹嘅要求咀足五秒鐘，完成儀式後就到拋花球環節，結果喺姊妹們幫手吓成功由余慕蓮成功攞到花球，成個過程同真實婚禮一模一樣。禮成之後Bonnie姐接受訪問時，就再三多謝台前幕後所有工作人員，佢話：「我一直都好感恩好開心，但有啲遺憾呢一生人仲未著過婚紗、未結過婚，所以今次我要嫁咗佢，唔好嘥咗青春年華。」
安排埋小鮮肉吳智杰同佢結婚行禮。
首次著起婚紗Bonnie姐又有咩感覺？佢話：「早知著婚紗係咁Happy咁開心，我早幾十年前就嫁咗佢。」一直保持單身嘅Bonnie姐解釋自己「不嫁」原因，佢話：「我哋呢一代人，年輕嘅時候為自己生活事業博殺勞勞碌碌幾十年，不經不覺而家都幾十歲，後生一輩未必會明我哋當年，我覺得機會嚟到就必須要把握，當然事業愛情家庭兼顧到就係最好，但我當年掛住工作失去好多機會，做女人應該做嘅例如結婚生仔組織家庭我都錯過咗。」
仲搵嚟鄧月平、鄺芷凡及余慕蓮做伴娘，婚禮喺邵音音嘅見證下一對新人進場。
‘回憶以前初入影圈嘅歲月，Bonnie姐話：「讀書唔成又發明星夢，入行後好想做出一啲成績，曾經係有好多人追，但當時成日左諗右諗，擔心嫁錯郎又唔想放棄演藝事業，無諗到人係會蒼老，好似朵花咁花開到最靚就會凋謝，終於到見到自己屋企人兄弟姊妹個個有家室，有時回望自己處境都落得清靜心安理得，既然上天有咁安排都無辦法。」
到今時今日，如果有理想對象出現，Bonnie姐又會唔會接受？佢話：「我從來都無抗拒，不過我自己對呢方面一啲都唔敏感，朋友話我有眼無珠，有啱嘅對象都睇唔清楚，加上年青時怕醜又要矜持，人生經驗又唔夠所以唔夠膽講嘢。」雖然其實生活中未能如願，但有機會喺節目中披嫁衣，Bonnie姐話已經好滿足：「雖然係拍節目，但我一樣好開心，唔怪得啲人話人生不論男女一定要經歷一次婚禮，除咗扮得靚靚之外，原來得到咁多人祝福係咁High嘅。」
婚禮喺邵音音嘅見證下一對新人進場。
至於新郎哥吳智杰，就表示Bonnie姐同音音姐兩位前輩喺節目內相當玩得，佢話：「雖然我哋隔咗唔止兩個Generation，但係節目入面我哋出去講玩講食，又要佢哋用交友Apps識人，都玩得好投入。」對於要迎娶Bonnie姐，佢話：「好緊張，我哋呢段叫做嫲孫戀，仲犀利過姐弟戀。」而一班伴娘同新奶奶音音姐亦恭賀一對新人，音音姐仲抵死向「新抱」Bonnie姐訓話：「要做人新抱記得服侍得奶奶舒舒服服，每日記住做兩件事就係每朝幫我倒痰罐，每晚同我洗腳按腳，娶到你我好放心，因為你包保你唔會紅杏出牆。」
(蘋果日報)
